Shugaban ƙasa Bola Ahmed Tinubu ya kira muhimman taruka na Majalisar Kasa (Council of State) da Majalisar ’Yan Sanda (Police Council), domin tattauna matsalar tsaro da ke ƙara ta’azzara a ƙasar nan da sauran batutuwan da suka shafi ƙasa baki ɗaya. Taron zai gudana a ranar Alhamis, 9 ga Oktoba, 2025, a Fadar Shugaban Ƙasa, Abuja.

A cewar Fadar Shugaban Ƙasa, wannan mataki na nuna sabuwar ƙudurarsa wajen ƙarfafa tsarin tsaron Najeriya da dawo da amincewar jama’a a cikin wannan yanayi na ƙarin rashin tsaro.

A wata sanarwa da Sakataren Dindindin na Ofishin Harkokin Majalisa, Dokta Emanso Umobong, ya fitar a ranar Litinin, ya bayyana cewa Sakataren Gwamnatin Tarayya (SGF), Sanata George Akume, ya aika da takardar gayyata ga mambobin majalisun biyu don halartar taron ta fuskar zahiri ko ta yanar gizo.

Sanarwar ta ce: “Za a tattauna batutuwan da suka shafi ƙasa, musamman wadanda suka shafi tsaro da harkokin ’yan sanda. Za a gudanar da taron Majalisar Kasa da karfe 1:00 na rana, sannan Majalisar ’Yan Sanda za ta biyo bayan ta da karfe 2:00.”

Majalisar Kasa, wadda Shugaban Ƙasa ke jagoranta, na ƙunshe da tsoffin shugabannin ƙasa, tsoffin manyan alkalai, gwamnonin jihohi, da Babban Lauyan Ƙasa. Ita ce ke ba da shawara kan harkokin tsaro, muhimman mukamai da sauran manyan lamurra na ƙasa.

Majalisar ’Yan Sanda kuma na da alhakin kula da tsarin gudanarwa da harkokin aikin ’yan sanda, ciki har da naɗe-naɗe da ladabtar da manyan jami’an hukumar.

Majiyoyi daga Fadar Shugaban Ƙasa sun bayyana cewa tarukan za su yi nazari kan halin tsaro a ƙasa, su tantance ayyukan soji da ke gudana, tare da samar da sabbin dabaru don rage ta’addanci, satar mutane, da rikice-rikicen ƙabilanci, musamman a yankunan Arewa da Tsakiyar ƙasa.

Haka kuma ana sa ran za a tattauna batutuwan siyasa da na gudanarwa, ciki har da zaben sabon shugaban hukumar INEC wanda zai maye gurbin wanda wa’adinsa ke ƙarewa.

Wannan sanarwar ta fito ne bayan dawowar Shugaba Tinubu Abuja da yammacin Litinin daga ziyarar aiki ta kwana goma da ya kai Legas, inda ya gana da masu zuba jari, abokan cigaba, da shugabannin siyasa.

A cewar Ofishin Yada Labarai na Fadar Shugaban Ƙasa, jirgin shugaban ƙasa, BBJ T7-NAS mai rajistar San Marino, ya sauka a filin jirgin sama na Nnamdi Azikiwe da karfe 6:55 na yamma.

Yayin zamansa a Legas, Tinubu ya gana da manyan ’yan kasuwa kamar Bayo Ogunlesi, Shugaban Global Infrastructure Partners, da Keem Belo-Osagie, Shugaban Metis Capital Partners, inda suka tattauna kan hanyoyin ƙarfafa jari a fannin gine-gine, makamashi, da sufuri muhimman ginshiƙai na ci gaban tattalin arziki da samar da ayyukan yi.

Haka kuma, ya gana da Sakatare-Janar na International Maritime Organisation (IMO), Arsenio Dominguez, tare da Ministan Harkokin Ruwa da Tattalin Arzikin Ruwa, Adegboyega Oyetola, domin nazarin damar da ke cikin sabon fannin tattalin arzikin ruwa na Najeriya.

Kafin dawowarsa Abuja, Shugaba Tinubu ya ziyarci jihohin Oyo, Imo, da Filato domin wasu ayyukan gwamnati, inda ya jaddada kudurinsa na tabbatar da haɗin kan ƙasa, tsaro, da ci gaba mai ɗorewa.

A yayin halartar jana’izar mahaifiyar shugaban jam’iyyar APC na ƙasa, Farfesa Nentawe Yilwatda, a Jos, Shugaban Ƙasa ya jaddada cewa: “Manufata ita ce in haɗa ƙasar nan ɗaya kuma in tabbatar da zaman lafiya da wadata. Akwai ci gaba a waɗannan fannoni guda biyu.”

Taron Majalisar Kasa na ranar Alhamis zai kasance na biyu tun bayan hawar Shugaba Tinubu, kuma ana sa ran zai ƙarfafa haɗin kai tsakanin gwamnati ta tarayya da jihohi wajen magance ƙalubalen tsaro da ke damun ƙasar.