Sojojin Rundunar 6 Brigade na Rundunar Sojin Najeriya tare da hadin gwiwar jami’an ’Yan Sanda sun samu nasarar ceto mutane shida da aka sace, ciki har da wani yaro, a Jihar Taraba.

Mai rikon mukamin Daraktan Hulda da Jama’a na Rundunar Soji, Laftanar Umar Mohammed, ne ya bayyana hakan cikin wata sanarwa da aka fitar ranar Asabar a garin Jalingo, babban birnin jihar.

A cewarsa, masu garkuwa da mutane sun tare wata mota kirar Toyota Carina II da take tafiya daga Katsina-Ala a Jihar Benue, inda suka tilasta direban tsayawa a kusa da tsohon shingen bincike kafin su yi awon gaba da fasinjojin motar.

Da zarar jami’an 6 Brigade suka samu bayanan sirri a kan lamarin, tare da hadin kai da ’Yan Sanda, suka hanzarta kaddamar da bincike a yankin. Wannan matakin gaggawa ne ya taimaka wajen ceto mutane shida, ciki har da direban da kuma fasinjoji biyar.

Mai magana da yawun rundunar ya bayyana sunayen wadanda aka ceto da cewa: Mista Terna Gbaya (43), Mista Musa Adamu (55), Hajiya Rose Sor (35), Hajiya Lydia Vyiashima (40), Hajiya Comfort Iyofar (60), da kuma wani jariri.

Ya tabbatar da cewa dukkan wadanda aka ceto sun hadu da iyalansu lafiya.

Mohammed ya kara da cewa har yanzu jami’an tsaro na ci gaba da gudanar da bincike da aikin ceto domin cafke wadanda suka aikata garkuwa da kuma kubutar da duk wani mutum da zai iya kasancewa a hannunsu.

Kwamandan Rundunar 6 Brigade, Birgediya Janar Kingsley Chidiebere Uwa, ya yaba da yadda jami’an sojoji da ’yan sanda suka nuna kwarewa da saurin daukar mataki wanda ya kai ga samun wannan nasarar.

Ya kuma jaddada kudirin rundunar wajen tabbatar da tsaron rayuka da dukiyoyin al’umma a fadin Jihar Taraba, tare da nanata cewa rundunar za ta ci gaba da hadin gwiwa da sauran hukumomin tsaro domin kawar da ’yan ta’adda da masu aikata laifuka a jihar.