Rundunar Sojin Sama ta Najeriya (NAF) ta ƙara ƙaimi wajen yaƙi da fasa-ƙwauri a iyakoki, tana gargadin dakarunta musamman waɗanda ke aiki a yankin Neja Delta da su guji kowanne irin hannu ko halayya da ka iya cutar da tsaron ƙasa.

An ƙaddamar da wannan sabon yaƙin ne a ranar Juma’a a Fatakwal, a matsayin wani ɓangare na hangen nesa na Shugaban Hafsan Sojin Sama, Air Marshal Hasan Abubakar, domin ƙarfafa ladabi, inganta ƙwarewa, da kare tattalin arzikin ƙasa da muradun ƙasar.

Wata sanarwa da NAF ta wallafa a shafinta na X ta bayyana cewa taron wayar da kai na wannan rana ya ɗauki taken “Illolin Fasa-ƙwauri a Iyakoki da Tasirin Sa ga Tsaron Ƙasa da Hoton Rundunar Sojin Sama.” An shirya shi ne don haskaka mummunar illa da fasa-ƙwauri ke kawowa da kuma dangantakarsa da manyan laifukan ƙasa da ƙasa.

A jawabin da ya gabatar, Provost Marshal na Sojin Sama, Air Vice Marshal Jibrin Usman, ya nuna yadda fasa-ƙwauri a iyakoki – ciki har da satar man fetur, safarar makamai, da kasuwancin kaya haramtattu – ke zama babbar hanyar samar da kuɗaɗe ga ƙungiyoyin miyagun laifuka da na ta’addanci a sassan Najeriya.

Yana wakiltar Shugaban Hafsan Sojin Sama, AVM Usman ya jaddada matsayin NAF na rashin jurewa duk wata rashin da’a, yana mai bayyana cewa fasa-ƙwauri ba wai kawai yana raunana tattalin arzikin ƙasa ba, har ma yana rushe amincin jama’a ga rundunar soji.

“Fasa-ƙwauri na rage tattalin arziki, yana haifar da rashin tsaro, kuma yana lalata amincin jama’a,” in ji shi, yana yi wa dakarun gargaɗi mai ƙarfi da su kiyaye rantsuwarsu da ƙimar da ke tattare da kayan suttura.

Rundunar ta kuma sanar da cewa duk wani jami’in NAF da aka samu da hannu wajen taimaka wa masu fasa-ƙwauri zai fuskanci cikakken hukuncin dokar soja, tana mai bayyana irin wannan aiki a matsayin cin amanar rundunar da ƙasar baki ɗaya.

An kuma shawarci dakarun da ke aiki a yankin Neja Delta da su kasance cikin shiri da ƙwararru wajen kare muhimman dukiyar ƙasa da manyan hanyoyin tattalin arziki.

Wannan shirin wayar da kai yana cikin ginshiƙan falsafar mulki na Air Marshal Abubakar da ake kira “Horon Gangan da Ci gaban Runduna Bisa Manufa,” wanda ya mai da hankali kan ladabi, gina ƙwarewa, da sake jaddada ɗabi’a a cikin dakarun.

A ƙarshe, an kammala taron da aikin dasa bishiyoyi a matsayin alama, domin nuna jajircewar NAF wajen tabbatar da tsaron ƙasa da kuma kare muhalli a duk inda take gudanar da ayyukanta.