Babbar Kotun Tarayya da ke zama a Warri, Jihar Delta, ta umurci Hukumar ‘Yan Sandan Najeriya da Sufeton Janar na ‘Yan Sanda da su ci gaba da kasancewa a matsayin da suke yanzu (status quo) a cikin wata kara da aka shigar domin kalubalantar sahihancin sabon tsarin da aka dawo da shi na izinin gilashin mota mai duhu (tinted glass).

Lauya John Aikpokpo-Martins ne ya shigar da karar, inda ya bayyana cewa matakin tilasta bin tsarin da ‘yan sanda suka gabatar ba shi da halaccin doka kuma ya saba wa dokar Motoci ta 1991 wadda ta tanadi bayar da lasisin gilashi mai duhu ne kawai idan akwai dalilai na musamman, irin su lafiyar jiki ko tsaro.

‘Yan sanda sun dawo da tsarin bayar da lasisin gilashin mota mai duhu ta hanyar tsarin intanet ɗin su, POSSAP, suna mai da martani ga koke-koken jama’a game da cin zarafin direbobi da kuma barazanar tsaro da ke tattare da motocin da ke da gilashin duhu. Hukumar ta fara aiwatar da cikakken tsarin a watan Yuni 2025 bayan kwanaki 30 na sassauci, amma daga baya ta kara wa’adin zuwa watan Agusta sannan kuma zuwa watan Oktoba domin bai wa masu ababen hawa karin lokaci su bi doka.

Hukumomin ‘yan sanda sun kare wannan tsari da hujjar tsaro, suna mai jaddada cewa masu aikata laifi na yawan amfani da motocin da ke da gilashin duhu ko na kamfani don boye ayyukansu da gujewa gano su.

Sai dai Aikpokpo-Martins ya dage cewa wannan mataki na tilas yana zamewa nauyi mara adalci ga direbobin da ba su karya doka, yana karya hakkin sirri da ‘yancin motsi na ‘yan kasa da kuma iya haifar da karin cin zarafi daga jami’an tsaro.

Matsayinsa ya samu karbuwa daga kungiyoyin fararen hula da kuma Kungiyar Lauyoyin Najeriya (NBA), wadda ma ta shigar da nata karar daban tana kalubalantar tsarin a matsayin sabawa kundin tsarin mulki. NBA ta kuma nuna damuwa kan rashin gaskiya a tsarin neman lasisi, batun kudaden da ake karba, da kuma yuwuwar jami’an tsaro su yi amfani da tsarin wajen cin zalin jama’a.

Masu suka sun bayyana cewa ko da yake hujjar tsaro tana da muhimmanci, tsarin da aka kafa bai da cikakken bayani, adalci, da kuma ingantaccen kulawa. Haka kuma, direbobi da dama sun koka cewa tsarin neman lasisin yana da wahala sosai kuma yana daukar lokaci mai tsawo.

Ko da yake ‘yan sanda suna ci gaba da jaddada cewa shirin doka ne kuma wajibi ne domin tsaron jama’a, hukuncin kotun Warri ya nuna karuwar adawa daga bangaren shari’a da kuma jama’a.

Har sai an kammala sauraron karar, wannan umarni ya sanya shirin a dakace, abin da ya jefa makomar tsarin cikin duhu tare da barin daruruwan dubban direbobi cikin rashin tabbas kan bukatun bin doka da kuma halaccin wannan shiri baki daya.