Marigayi Kwamandan Gbenga Agun

A wata hira da yanzu ta zama ta karshe a rayuwarsa, Kwamandan Gbenga Agun na NSCDC reshen Jihar Edo ya zauna da Editan Jaridar People’s Security Monitor, Malam Isiaka Mustapha, inda suka tattauna kan daya daga cikin mafi muni a tarihin aikinsa — harin da ya kashe jami’ansa takwas a Edo. Da nutsuwa amma da jajircewa, Agun ya yi magana da wani hadin bakin ciki da jarumta, yana tuno zafin harin kwantan-bauna amma har yanzu yana tabbatar da biyayyarsa ga aikin tsaron kasa. Maganarsa ta nuna matsayin mutum da ya shaida sadaukarwa a ido, amma duk da haka bai daina gaskata muhimmancin kare rayuka da kuma kiyaye muhimman kadarorin kasa ba.

Wannan hira, wadda babu wanda ya san ita ce ta karshe a lokacin, ta zama shaida ta gaskiya daga jarumin da ya ba da komai ga rigar NSCDC. Jiya ne Kwamandan Agun ya amsa kiran karshe na rayuwa, ya bar tarihi na amana, jarumta, da hidima wanda ba za a taba mantawa da shi ba. Ga wadanda suka saurari kalamansa, wannan ba hira ba ce kawai, amma wata gadon murya ce da ke rera kalubale, fata, da juriya na kowanne jami’in NSCDC. Da rasuwarsa, Najeriya ta rasa jarumin zaman lafiya, amma labarinsa zai ci gaba da rayuwa.

HIRAR KARSHE

Tambaya: Za ka iya fada mana yadda lamarin kashe jami’anka takwas ya faru a Okpella, Edo, a ranar Juma’ar da ta gabata?

Amsa: Abin da ya faru a Juma’ar da ta gabata babban bala’i ne, babban rashi ga NSCDC da ma kasa baki daya, musamman al’ummar tsaro. A wannan rana, jarumanmu takwas suka fada cikin harbin ’yan ta’adda a Edo. Lamarin ya auku ne a wurin hakar dutsen BUA Cement da misalin karfe 10 na dare, bayan an gama aiki.

Bayan ma’aikatan ƙanana sun tafi, aka tafi da ’yan kasashen waje — musamman Sinawa, wadanda jami’anmu kan rika rakiyarsu — zuwa masaukansu. A lokacin ne ’yan ta’adda suka bude wuta. Duhu ne, kuma yankin dazuzzuka ne mai wahalar shiga.

A wannan rikici ne aka kashe jami’anmu takwas, aka sace wani dan kasar Sin daya, yayin da wasu jami’ai hudu da wani farar hula suka samu raunuka.

Tambaya: Menene ainihin aikinku a BUA Cement?

Amsa: Babban aikimu shi ne kare BUA Cement da duk abokan hulɗarta a yankin a matsayin kadarorin kasa. Haka kuma muna da alhakin tabbatar da tsaron dukkan ma’aikatan da ke aiki a wurin, na cikin gida da na waje. Mafi yawancin ’yan kasashen waje suna aiki a sashen hakar dutsen BUA.

Tambaya: Shin akwai wadanda suka tsira?

Amsa: Eh, akwai wadanda suka tsira. Jami’anmu hudu da direba sun tsira. Duk da cewa an yi garkuwa da dan kasar Sin daya, jami’anmu sun ceci wasu hudu. Wadanda aka kai asibiti suna samun sauki. Mun riga mun fara bincike, kuma ina tabbatar maka cewa mun fara samun bayanan sirri masu amfani.

Tambaya: Shin akwai wata kungiya da ta dauki alhakin harin?

Amsa: Babu wata kungiya da ta dauki alhakin. Amma bincike ya nuna cewa yankin da abin ya faru sanannen mafakar ’yan ta’adda ne tun da dadewa. Haka kuma akwai rikice-rikicen masu gona a yankin kan biyan kudin haya, wanda sau da yawa ke jawo tashin hankali. Wannan na iya zama daya daga cikin dalilan kai harin.

Tambaya: Za mu iya cewa wannan al’amari ya nuna gazawar leken asiri kenan?

Amsa: Gaskiya ban samu wani rahoton sirri kafin wannan mummunan lamari ba, ko bayan haka. Amma daga bangarenmu mun fara bincike domin gano asalin lamarin. Ina tabbatar maka cewa muna aiki tare da sauran hukumomin tsaro domin cafke wadanda suka aikata wannan danyen aiki.

Haka kuma mun gana da shugabannin BUA, mun tsara matakan da za su dauka domin kauce wa irin haka nan gaba. Muna sake tsara dabaru don karfafa tsaro a cikin da wajen wuraren BUA.