Hukumar Kashe Gobara ta Tarayya (FFS), Rundunar Jihar Gombe, ta hannun sansanin ayyukan kashe gobara na ATM, ta kai dauki cikin gaggawa bayan samun rahoton tashin gobara a Riyal Quarters, bayan gidan Alhaji Adamu P.A., a birnin Gombe, da misalin karfe 3:34 na rana.
Gobarar ta shafi wani gida mai dakuna hudu. Da zarar an samu kiran gaggawa, jami’an kashe gobara sun garzaya wurin cikin hanzari karkashin jagorancin Mataimakin Sufritendan Gobara na Farko (ASF I), Mohammed Gambo. Sun gudanar da ayyukan kashe gobara cikin sauri da kwarewa, inda suka dakile yaduwar gobarar zuwa sauran gine-ginen da ke kusa.
Binciken bayan kashe gobarar ya nuna cewa dukiyar da ta kai kimanin naira miliyan 7 ce ta lalace sakamakon gobarar. Sai dai, sakamakon gaggawar daukin da jami’an kashe gobara suka kai, an samu nasarar ceton dukiyar da kimarta ta kai kusan naira miliyan 20, musamman idan aka yi la’akari da barazanar yaduwar gobarar zuwa gine-ginen da ke makwabtaka da wurin da kuma kadarorin da ke yankin.
Babu rahoton asarar rai ko rauni da aka samu a yayin lamarin.
Hukumar Kashe Gobara ta Tarayya tana kira ga al’umma da su kasance masu taka-tsantsan wajen amfani da kayan lantarki da sauran abubuwan da ka iya haddasa gobara a cikin gidajensu. Hukumar ta jaddada cewa bin ka’idojin kare kai daga gobara da kuma gaggauta kai rahoton tashin gobara na da matukar muhimmanci wajen rage asara da kare rayuka da dukiyoyi.