Sojojin Operation Enduring Peace sun yi nasarar ceto wani tsohon babban jami’in Rundunar Sojin Najeriya, Kanar Ajanaku (mai ritaya), wanda wasu ‘yan bindiga suka sace a Ƙaramar Hukumar Bassa ta Jihar Plateau.

A cewar wata sanarwa da Rundunar Sojin Najeriya ta fitar a ranar Talata ta shafinta na X, an sace tsohon jami’in ne da sanyin safiyar Litinin, 5 ga Janairu, 2026, da misalin ƙarfe 12:45 na dare, daga gidansa da ke gaban Cocin Salvation Army a titin Rukuba, Ƙaramar Hukumar Bassa.

Rundunar ta bayyana cewa sojoji daga Sassan 1 da 3 na Operation Enduring Peace sun gaggauta tashi aiki bayan karɓar kiran gaggawa, inda suka bi sawun masu garkuwar ta hanyar hanyar da ke kusa da Yankin Gandun Dabbobi (Wildlife Park).

Daga bisani a wannan rana, da misalin ƙarfe 2:00 na rana, masu garkuwar sun kira matar wanda aka sace tare da neman kudin fansa Naira miliyan dari biyu (₦200,000,000). Sanarwar ta ce, sakamakon matsin lamba mai tsanani daga sojojin da ke binsu, masu garkuwar sun yi barazanar kashe wanda aka sace idan ba a dakatar da aikin bincike ba.

A martani, rundunar ta ce sojojinta sun koma dabarun aiki na ɓoye, lamarin da ya kai ga nasarar ceto Kanar Ajanaku ba tare da biyan ko sisi na kudin fansa ba.

An kammala aikin ceton da misalin ƙarfe 5:30 na yamma a ranar 5 ga Janairu, 2026, a bayan yankin Rafiki na Ƙaramar Hukumar Bassa, Jihar Plateau.

Rundunar ta kuma bayyana cewa an kai tsohon jami’in zuwa Cibiyar Lafiya ta Operation Enduring Peace, inda yake karɓar kulawar likitoci kuma halin lafiyarsa yana da kyau.

Za a yi masa tambayoyi domin samun muhimman bayanan sirri da za su taimaka wajen ci gaba da ayyukan bin sawu, in ji sanarwar.

A halin yanzu, sojojin Operation Enduring Peace na ci gaba da gudanar da aikin bincike a dazuzzukan da ke kewaye da yankin domin cafke masu garkuwar da suka tsere tare da tarwatsa cibiyar ayyukan su.

Rundunar Sojin Najeriya ta sake jaddada ƙudurinta na kare rayuka da dukiyoyin jama’a, tare da tabbatar da cewa za ta ci gaba da hana masu aikata laifuka samun damar yin abin da suka ga dama a yankunan da ake gudanar da ayyukan haɗin gwiwa.