Hukumar Nigeria Security and Civil Defence Corps reshen Jihar Sokoto ta kira taron hadin gwiwa da manyan masu ruwa da tsaki domin magance matsalar lalacewar kebul na fibre da sauran Muhimman Kadarorin Kasa a fadin jihar.
Taron ya gudana karkashin jagorancin Kwamandan Jiha, CC EA Ajayi, inda aka tattauna kan yadda ayyukan tono kasa ba tare da bin ka’ida ba ke haddasa katsewar hanyoyin sadarwa, musamman a wuraren aikin gina hanyoyi da gine gine.
Kwamandan ya bayyana cewa wannan mataki ya yi daidai da umarnin kare Muhimman Kayayyakin More Rayuwa na Kasa na shekarar 2024 wanda Office of the National Security Adviser ta bayar, wanda ya dorawa Hukumar alhakin kare Muhimman Kadarorin Kasa a fadin Najeriya.
Ya ce ci gaba da lalata kebul na fibre yana jawo katsewar intanet, durkushewar harkokin banki da kasuwanci, da kuma tangardar ayyukan muhimman sassa, lamarin da ke kawo cikas ga cigaban tattalin arziki da zamantakewa a jihar.
Kwamandan ya gargadi kamfanonin gine gine, ’yan kwangila da sauran masu aikin tono kasa da su guji yin hakan ba tare da yin binciken wuraren da kebul da sauran kayayyakin kasa suke ba. Ya jaddada cewa ba za a lamunci sakaci ko ganganci ba.
A yayin tattaunawar, ya kara da cewa kare Muhimman Kadarorin Kasa ba ya tsaya ga bangaren sadarwa kadai ba, har ma ya shafi bangarorin wutar lantarki, man fetur da iskar gas, lafiya da makamashi. Ya kuma ce duk wanda aka samu da laifin lalata kebul na fibre, layin dogo, tashoshin wuta, hasumiyoyin sadarwa da ramin manhole zai fuskanci hukunci mai tsanani.
Hukumar ta kuma bayyana cewa za ta kara wayar da kan jama’a ta kafafen yada labarai kamar rediyo da sauran hanyoyi domin fadakar da al’umma muhimmancin kare wadannan kadarori.
NSCDC ta Jihar Sokoto ta tabbatar wa masu ruwa da tsaki kudirinta na hada kai da kamfanonin sadarwa domin tantance taswirar kebul a fadin jihar, domin inganta tsaron kayayyakin more rayuwa da tsarin tsaro gaba daya.
A karshe, Kwamandan ya jaddada cewa a wannan zamani na bunkasar fasahar zamani da dunkulewar duniya, wajibi ne a kare Muhimman Kadarorin Kasa domin suna da matukar tasiri ga tsaron kasa da bunkasar tattalin arziki.