Rubutawa daga Isiaka Mustapha, Babban Jami’in Gudanarwa/Kakakin Edita, People’s Security Monitor

Major General Waidi Shaibu, sabon Babban Hafsan Sojan Kasa na Najeriya, yana daga cikin fitattun hafsoshin da suka haɗa jarumta, basira da tsantsar ƙwarewa wajen bauta wa ƙasarsa. An haife shi a ranar 18 ga Disamba, 1971, a karamar hukumar Olamaboro ta Jihar Kogi. Tafiyarsa daga ƙananan tsaunukan garinsa zuwa babban ofishin rundunar sojan kasa a Abuja labari ne na mayar da hankali, jajircewa da sha’awar cimma nasara ta gaskiya.

Ya fara aikin soja ne a shekarar 1989 bayan samun gurbin karatu a Makarantar Tsaron Najeriya (Nigerian Defence Academy, NDA) a matsayin ɗan aji na 41 Regular Course. A ranar 17 ga Satumba, 1994, aka ba shi mukamin Second Lieutenant a Rundunar Sojan Kasa Armour Corps, wanda ya zama farkon doguwar tafiya ta ƙwarewa da sadaukarwa wadda ta ɗauki sama da shekaru talatin na hidima ga Najeriya.

Major General Shaibu hafsan soja ne mai zurfin ilimi da hangen nesa. Ya kammala digiri na farko a fannin Injiniyan Inji daga NDA, ya samu takardar shaidar digiri na gaba a Public Administration daga Ghana Institute of Management and Public Administration, da kuma digirori da dama na biyu ciki har da MPA daga Jami’ar Calabar, digirin Strategic Studies daga Jami’ar Ibadan, da digirin Security and Strategic Studies daga National Defence University, Washington D.C., Amurka. Haka kuma ya halarci makarantar Harvard Kennedy School of Government inda ya kammala shirin Leadership for the 21st Century sannan ya sami Advanced Executive Certificate in Applied Leadership and Strategy daga National Productivity Senior Executive Programme. A halin yanzu yana ci gaba da karatun digiri na uku a Strategic Studies a Jami’ar Ibadan.

A tsawon aikinsa, Major General Shaibu ya halarci darussa da dama na soja a gida da ƙasashen waje. Daga cikin su akwai Young Officers Courses (Armour da Infantry), Company Amphibious Operation Course a Calabar, Platoon Commanders Course da Junior da Senior Staff Courses a makarantu daban-daban na sojan kasa. Haka kuma ya halarci Counter Terrorism Fellows Programme a College of International Security Affairs, Washington D.C., wanda ya faɗaɗa iliminsa kan dabarun yaki da ta’addanci da tsarin tsaro na duniya.

A fagen aiki, Major General Shaibu ya taka muhimmiyar rawa a cikin manyan ayyukan soja na cikin gida da na ƙasashen waje. Ya halarci Operation Harmony, Boyona, Zaman Lafiya, Lafiya Dole, Tura Takaibango, Hadin Kai, Desert da Lake Sanity. Haka kuma ya wakilci Najeriya a African Mission in Sudan, United Nations Mission in Liberia da Foreign Training Assistance Mission to Liberia. A duk inda ya yi aiki, ya nuna natsuwa, ƙarfin tunani da ingantaccen jagoranci.

Ya riƙe mukamai da dama masu muhimmanci a cikin rundunar. Daga cikin su akwai Platoon Commander a 245 Recce Battalion, ADC ga GOC 3 Division, Chief Instructor a Nigerian Army Armour School, Director Coordination da Directing Staff a National Defence College, Chief of Staff na 23 Brigade Headquarters a Yola, Commander na 21 Special Armoured Brigade a Bama da General Officer Commanding 7 Division/Commander Sector 1, Operation Hadin Kai. Ya kuma yi aiki a matsayin Theatre Commander Joint Task Force (North East) sannan kafin nadinsa a matsayin COAS shi ne Director of Armour Research a Nigerian Army Heritage and Future Centre.

An karrama shi da lambobin yabo masu yawa na soja ciki har da Distinguished Service Star, Distinguished Service Order, Foreign Training Assistance Medal, Field Command Medal, Field Command Medal of Honour, Command Medal, General Operations Medal, Defence Operations Medal da kuma Purple Heart Medal saboda jarumta da sadaukarwa wajen yaki da ta’addanci. Haka kuma shi ne Fellow na National Defence College da memba na Nigerian Institute of Management.

A bayan fagen aiki, Major General Waidi Shaibu mutum ne mai natsuwa, mai son karatu da tunani mai zurfi. Yana jin daɗin yawo da safe da karatun littattafai. Mutum ne mai kwarewa, nagarta da kishin ƙasa wanda ya auri mace ɗaya kuma Allah Ya albarkace su da ‘ya’ya.

Nadinsa a matsayin Babban Hafsan Sojan Kasa na Najeriya ya zo a wani lokaci mai matuƙar muhimmanci a tarihin tsaron ƙasa, lokacin da ake buƙatar jarumta, fasaha da jajircewa. Tare da haɗin ilimi, ƙwarewa da amana, Major General Shaibu yana wakiltar sabon salo na jagoranci a rundunar sojan kasa jagora mai natsuwa, mai hangen nesa kuma mai gaskiya wajen tabbatar da zaman lafiya da ɗorewar haɗin kan Najeriya.