Keji Mustapha
Rundunar Nigeria Security and Civil Defence Corps (NSCDC) ta Jihar Sokoto ta taya al’ummar Musulmi murnar shigowar watan Ramadan mai alfarma, tare da kira ga addu’o’in zaman lafiya, haɗin kai da ci gaban ƙasa.
A cikin saƙon da aka fitar ranar Laraba, Kwamandan Jihar, CC E.A. Ajayi, ya taya Musulmi a Jihar Sokoto da ma faɗin ƙasa murnar fara azumin watan mai tsarki. Ya bayyana Ramadan a matsayin lokaci na tausayi, tunani mai zurfi da sabunta niyyar yi wa al’umma hidima.
Kwamandan ya kuma isar da gaisuwa ta musamman ga Babban Kwamandan Rundunar, Ahmed Abubakar Audi, da Kwamandan Yanki na 10, ACG Bello Alkali Argungu, bisa jagoranci da goyon bayan da suke bai wa Rundunar ta Jihar Sokoto. Haka kuma ya yaba wa ma’aikatan gudanarwa bisa jajircewarsu wajen aiki.
Ajayi, a madadin shugabanni da jami’an Rundunar, ya yi fatan alheri, ƙoshin lafiya da nasara ga dukkan Musulmin da ke gudanar da azumi. Ya ce watan Ramadan dama ce ta ƙarfafa imani, ƙara ladabtarwa da kuma bunƙasa darajojin haƙuri da juriya.
Ya yi addu’ar cewa watan mai alfarma zai kawo zaman lafiya da kwanciyar hankali ga Nijeriya da Musulmi a duk faɗin duniya, tare da roƙon Allah Ya ba da rahama, falala da shiriya a duk tsawon wannan lokaci mai albarka.
Mustapha Alhaji
