Hedikwatar Tsaro ta Ƙasa (DHQ) ta ƙara tsaurara matakan sa-ido da bincike domin bin sawun ’yan Boko Haram da na ISWAP da ke tserewa daga maboyarsu bayan hare-haren sama da Amurka ta kai a wasu sassan arewacin Najeriya.

Shugaban Amurka, Donald Trump, ya sanar a ranar Kirsimeti cewa sojojin ƙasar sun kai munanan hare-haren sama kan wuraren da ’yan ISIS ke amfani da su a arewa maso yammacin Najeriya. Daga bisani, Gwamnatin Tarayya ta tabbatar da wannan aiki, tana bayyana shi a matsayin wani ɓangare na haɗin gwiwar yaƙi da ta’addanci tsakanin Najeriya da Amurka.

Bayan hare-haren, an samu rahotannin motsi da ƙauracewar ’yan bindiga zuwa wasu yankuna. Shugabannin al’umma a Karamar Hukumar Gwer West ta Jihar Benue sun nuna damuwa kan abin da suka kira shigowar makiyaya masu ɗauke da makamai cikin wasu al’ummomi. Haka kuma, al’ummomi a Tangaza, Gudu da wasu sassan Illela a Jihar Sakkwato sun ce sun lura da motsi da watsewar ƙungiyoyin ’yan ta’adda.

Wasu daga cikin mazauna yankunan, da suka nemi a sakaya sunansu, sun ce an ga ’yan bindiga suna tafiya ƙananan ƙungiyoyi ta hanyoyin daji masu nisa, yayin da ake zargin wasu na ƙoƙarin tsallaka iyakokin ƙauyukan da ke makwabtaka da ƙasashen waje.

Sai dai manyan jami’an soji sun bayyana cewa ana da cikakken iko da lamarin, kuma ana bibiyar dukkan motsin ’yan ta’addan. Wani babban jami’in soji ya ce rundunonin tsaro na da bayanan sirri da ke tabbatar da cewa ’yan ta’addan suna tserewa bayan hare-haren sama.

“Mun san suna tserewa. Muna da bayanai, kuma ana sa-ido tare da bin sawun duk motsinsu,” in ji jami’in.

Wani jami’in ya ƙara da cewa ana ci gaba da ayyukan leƙen asiri, sa-ido da bincike (ISR) domin tabbatar da cewa ’yan ta’addan ba su sake haɗuwa ko kafa sabbin sansanoni ba.

A halin da ake ciki, wasu tsofaffin manyan jami’an soji sun bayyana ra’ayoyi mabambanta kan yiwuwar tura sojojin Amurka zuwa Najeriya. Ministan Harkokin Waje, Yusuf Tuggar, ya ce Ma’aikatar Tsaro za ta ba Gwamnatin Tarayya shawara kan matakai na gaba idan aka yanke shawarar irin wannan.

Wani tsohon babban jami’in soji, Birgediya Janar Peter Aro (mai ritaya), ya nuna rashin goyon bayansa ga tura sojojin ƙasashen waje cikin Najeriya, yana mai gargadin cewa hakan na iya haifar da matsaloli masu girma ta fuskar doka, diflomasiyya da zamantakewa. Ya ce duk wani irin mataki dole ne ya kasance karkashin yarjejeniyar tsaro da aka amince da ita a matakin koli na gwamnati.

A cewarsa, Najeriya na da isassun sojoji a ƙasa, ciki har da sojojin ƙasa, ’yan sanda da jami’an tsaron farar hula. Ya jaddada cewa gibin da ake da shi a yaƙin da ta’addanci ya fi shafar ƙarfin sama, sa-ido da kai hare-hare na zamani, inda Amurka za ta iya ba da taimako ba tare da tura sojojinta ƙasa ba.

A gefe guda, wani tsohon jami’in soji, Birgediya Janar Bashir Adewinbi (mai ritaya), ya goyi bayan ƙarfafa haɗin gwiwar tsaro da Amurka, yana mai cewa haɗin kai tsakanin ƙasashe abu ne na al’ada. Ya danganta hare-haren Kirsimeti da haɗin gwiwar tsaro tsakanin Najeriya da Amurka, yana mai cewa duk wata hadin kai dole ne ta bi hanyoyin diflomasiyya tare da fayyace sharuddan aiki.

Haka kuma, Manjo Janar Dayo Olukoju (mai ritaya) ya yi gargadi kan yin kuskuren dabaru, yana mai cewa duk wani mataki da ya shafi sojojin ƙasashen waje dole ne a yi shi da tsantsar taka-tsantsan.

Tsohon kakakin Rundunar Sojin Sama ta Najeriya, Group Captain Sadique Shehu (mai ritaya), ya soki ra’ayin tura sojojin Amurka domin yaƙar ta’addanci a Najeriya. Ya ce Najeriya na iya neman taimakon fasaha da bayanan sirri daga ƙasashen waje, amma bai dace a dogara da sojojin waje wajen yaƙi a cikin ƙasar ba.

Ya kuma ce har yanzu babu tabbacin bayanai kan ko an kashe ’yan ta’adda a hare-haren sama da aka kai, yana mai cewa ya kamata ’yan Najeriya su ji bayani kai tsaye daga hukumomin ƙasarsu, ba daga ƙasashen waje ba.

A ƙarshe, wani ɗan majalisar dokokin Amurka, Riley Moore, ya kare Shugaba Trump, yana mai cewa hare-haren saman an yi su ne domin kawo zaman lafiya da tsaro a Najeriya. A wani saƙo da ya wallafa a shafin X, Moore ya ce hare-haren da aka kai a ranar Kirsimeti, tare da haɗin gwiwar Gwamnatin Najeriya, sun ba da fata ga al’ummomin da ke fama da ta’addanci.