Kwamandan Jihar Lagos na Hukumar Tsaro da Kare Fararen Hula ta Najeriya (NSCDC), Malam Adedotun Keshinro, ya karɓi manyan jami’an Tetracore Energy Group ƙarƙashin jagorancin Shugabar Ayyukan Kamfanoni, Mrs. Nkiru Onwordi, domin ƙarfafa haɗin gwiwa tsakanin ɓangarorin biyu.
Taron ya gudana ne a Hedikwatar NSCDC ta Jihar Lagos da ke Alausa, Ikeja, inda aka tattauna hanyoyi masu ma’ana na haɓaka haɗin kai tsakanin Hukumar da ɓangaren masu zaman kansu domin inganta tsaro da ingancin ayyuka.
Kwamanda Keshinro ya jaddada muhimmancin haɗin gwiwa mai ƙarfi tsakanin gwamnati da kamfanoni masu zaman kansu a matsayin muhimmin dabaru na tinkarar kalubalen tsaro da ke ci gaba da sauyawa a Najeriya. Ya bayyana cewa aiki tare tsakanin hukumomin gwamnati da kamfanoni na da matuƙar muhimmanci wajen rufe gibin tsaro a faɗin ƙasar.
Yana yaba wa Tetracore Energy Group bisa jajircewarta, Kwamandan ya bayyana haɗin kai da haɗin gwiwa a matsayin ingantattun hanyoyi na cimma tsaro mai ɗorewa. A nata jawabin, Mrs. Onwordi ta bayyana cewa ziyarar ta su na da nufin ƙulla dangantaka mai ƙarfi da Hukumar, tare da neman ƙarin tallafin tsaro ga kamfaninta da sauran kamfanoni a Jihar Lagos, tana kuma kira ga NSCDC da ta ci gaba da kiyaye ƙwarewa da mutuncin aiki.