Rundunar Sojojin Najeriya ta sake jaddada aniyarta na ƙarfafa dangantaka mai kyau tsakanin sojoji da fararen hula ta hanyar wasanni da shirye-shiryen haɗin kai da al’umma. Babban Daraktan Hulɗar Sojoji da Jama’a, Manjo Janar Gold Chibuisi, ne ya bayyana haka yayin kaddamar da sabuwar filin “Hole 3 Tee Box” da aka gyara a Kano Golf Club, a ranar Asabar, 11 ga Oktoba, 2025. Hedikwatar Rundunar Sojoji ta 3 Brigade ce ta aiwatar da aikin.

Manjo Janar Chibuisi ya bayyana cewa wannan aikin na daga cikin kokarin rundunar wajen gina amana, fahimtar juna da haɗin kai tsakanin sojoji da al’ummar da suke zaune tare. Ya yaba wa Kwamandan 3 Brigade, Birgediya Janar Ahmed Tukur, bisa hangen nesansa da jagoranci na kirki wajen farawa da kammala aikin, yana mai cewa aikin alama ce ta zumunci da haɗin kai tsakanin rundunar soja da fararen hula.

A nasa jawabin, Birgediya Janar Tukur ya sake jaddada kudurin rundunar sa na ƙarfafa dangantakar sojoji da fararen hula ta hanyar ayyukan da ke da manufar jin ƙai da zaman lafiya. Ya ce irin waɗannan shirye-shirye suna taimakawa wajen tabbatar da zaman lafiya da girmama juna tsakanin rundunar soja da al’umma.

Shi ma Kwamandan Asibitin Sojoji na Musamman da ke Kano, Kanar Ishiaku Abdulkareem, ya bayyana tarihin Kano Golf Club wacce aka kafa tun a shekarar 1908. Ya yaba wa Sojojin Najeriya bisa rawar da suka taka wajen gyaran wurin da kuma ci gaba da kare tarihi da dangantaka mai kyau tsakaninsu da kulob ɗin.

Shugaban Kano Golf Club, Alhaji Babangida Umar, ya nuna godiyarsa ga Sojojin Najeriya saboda sake gyaran filin golf ɗin, yana mai cewa hakan shaida ce ta jajircewar rundunar wajen ƙarfafa haɗin kai da ci gaban al’umma.

A wani bangare kuma, Babban Kwamandan Runduna ta 1, Manjo Janar A.S.M. Wase, ya kaddamar da sabuwar Cibiyar Sojoji da aka sake gyarawa a Bukavu Barracks, Kano. An tsara cibiyar ne don samar da wurin hutawa da nishaɗi mai kyau wanda zai ƙara wa sojoji ƙwarin gwiwa da jin daɗin aiki.

Kwamandan Garrison, Laftanar Kanar Ikechukwu Ekoh, ya gode wa Kwamandan Brigade bisa hangen nesansa da jajircewarsa wajen kammala aikin, yana mai cewa aikin na tafiya da manufar Babban Hafsan Sojojin Ƙasa ta “Soja Na Farko,” wacce ke mai da hankali wajen inganta walwala da jin daɗin ma’aikata.

Wadannan taruka biyu sun tabbatar da jajircewar Rundunar Sojojin Najeriya wajen kula da walwala da jin daɗin jami’anta, tare da ci gaba da ƙarfafa haɗin kai tsakanin sojoji da al’ummar ƙasa baki ɗaya.