Babban Kwamandan Hukumar Kariya Daga Gobara ta Tarayya (Federal Fire Service – FFS), Olumode Adeyemi Samuel, ya gargadi jami’ai da ma’aikatan hukumar da su guji duk wata harka ta cin hanci ko rashawa wajen daukar aiki da sauran ayyuka marasa gaskiya, yana mai jaddada muhimmancin gaskiya da jajircewa wajen gudanar da aiki.

Ya fitar da wannan gargadi ne yayin ziyarar aikinsa ta farko a Abuja Metropolitan Command da ke Kubwa, inda ya gana da jami’ai domin jin korafe-korafensu da kuma tabbatar da kudirinsa na ci gaba da gyare-gyare a hukumar.

A yayin jawabin sa, CG Olumode ya tunatar da jami’an cewa aikin kashe gobara ba kawai aiki ne da ake biyan albashi ba, amma kiran gaggawa ne na hidima ga jama’a domin kare rayuka da dukiyoyi.

“Aikin kashe gobara ba kawai don samun albashi ake yi ba,” in ji shi. “Aikin ne na sadaukarwa domin kare al’umma, cibiyoyi da kadarorin kasa. Lokacin da mutane ke gudu daga gobara, masu kashe gobara suna ruga zuwa wajen domin ceton rayuka da dukiya.”

Babban Kwamandan ya kuma bayyana cewa ana ci gaba da kokarin samun makudan kudaden hukumar kai tsaye daga asusun gwamnati (first-line charge), inda ya bayyana cewa ya riga ya gana da Akanta Janar na Tarayya domin tabbatar da samun ‘yancin kudi da saurin sakin kudaden gudanar da aiki.

A wani mataki na inganta jin dadin ma’aikata, CG Olumode ya sanar da karin iyakar lamunin hadin gwiwar ma’aikata daga ₦300,000 zuwa ₦500,000, yana mai tabbatar da cewa shugabancinsa zai ci gaba da samar da yanayin aiki mai kyau da kuma inganta rayuwar ma’aikata a fadin kasar.