Hukumar Kashe Gobara ta Tarayya (Federal Fire Service – FFS) ta cimma wani muhimmin mataki a tarihinta bayan nasarar kammala Regular Course 06, wanda ya kasance shirin horas da jami’ai mafi girma da Hukumar ta gudanar a shekarun baya-bayan nan, kuma horon cikakke na farko ga sabbin jami’an da aka dauka aiki tun daga shekarar 2019.
An gudanar da Bikin Fitar Dalibai (Passing Out Parade – POP) a yau, Alhamis, 5 ga Fabrairu, 2026, a Makarantar Horaswa ta NDLEA, Jos, Jihar Plateau, wanda ya nuna ƙarshen horaswar zama ta makonni tara mai tsanani, da aka tsara domin ƙarfafa tsaron kashe gobara da kuma inganta damar amsa gaggawa a Najeriya.
Fiye da dalibai 700, waɗanda suka haɗa da jami’an da aka ɗauka aiki a shekarun 2022 da 2024 daga sassa daban-daban na ƙasar nan, sun samu horo mai tsauri a fannoni da suka haɗa da kashe gobara, ayyukan ceton gaggawa, haɓaka jagoranci, ladabi, aiki tare, da yanke shawara a ƙarƙashin matsin lamba. Shirin ya nuna sabon ƙudurin Hukumar Kashe Gobara ta Tarayya na rigakafin bala’o’i tun da wuri, ƙwarewa a aiki, da inganta iya amsawa cikin gaggawa a duk faɗin ƙasa.
Ministan Harkokin Ciki kuma Shugaban Hukumar Civil Defence, Correctional, Fire and Immigration Services Board (CDCFIB), Dr. Olubunmi Tunji-Ojo, ya samu wakilci a wajen bikin daga Sakataren Hukumar, Manjo Janar A. M. Jibril (mai ritaya), wanda ya buɗe faretin tare da gabatar da jawabin Ministan.
Da yake magana kan muhimmancin horon, Babban Daraktan Hukumar Kashe Gobara ta Tarayya, Olumode Samuel Adeyemi, MBA, MDRM, FCNA, ACTI, ya bayyana cewa a ‘yan shekarun nan Hukumar ta bai wa gina ƙwarewa, shirye-shiryen aiki, da isar da ayyuka a duk faɗin ƙasa muhimmanci domin fuskantar sababbin ƙalubalen gobara da gaggawa. Ya ce nasarar horaswa da fitar da fiye da dalibai 700 na ƙara nuna ci gaba da gyare-gyaren da ake yi domin ƙarfafa iya amsawa, faɗaɗa ƙwararrun ma’aikata, ƙarfafa haɗin gwiwa tsakanin hukumomi, da inganta hidima ga al’ummomi a duk faɗin ƙasar. Ya ƙara da cewa sabbin jami’an sun shirya tsaf domin tura su aiki nan take a fannoni na rigakafin gobara, amsa gaggawa, da rage haɗarin bala’o’i a ƙasa baki ɗaya.
A nasa jawabin, Sakataren Hukumar ya jaddada muhimmancin ci gaba da horaswa, ladabi, da haɗin gwiwar hukumomi wajen gina hukumomin tsaro masu juriya, tare da yaba wa Hukumar Kashe Gobara ta Tarayya bisa nasarar aiwatar da irin wannan babban shirin horaswa mai tasiri.
Haka kuma, Mataimakiyar Gwamnan Jihar Plateau, Mai Girma Uwargida Josephine Pyo, wadda ta wakilci Gwamnan Jihar, ta taya daliban murna bisa nasarar kammala kwas ɗin. Ta shawarce su da su riƙe kyawawan ɗabi’u da muhimman ƙa’idojin Hukumar, tare da yaba wa Hukumar Kashe Gobara ta Tarayya bisa rawar da take takawa wajen kare rayuka da dukiyoyi a duk faɗin Najeriya. Ta kuma yaba wa malamai masu horaswa bisa jajircewarsu wajen gina ladabi da ƙwarewa a cikin daliban, tare da tabbatar da ci gaba da goyon bayan Gwamnatin Jihar Plateau ga hukumomin tsaro na tarayya.
A jawabin godiya, Kwamandan Kwalejin Gobara ta Najeriya (NFA), ACF Peter Umetali, ya nuna godiya ga Mai Girma Shugaban Ƙasa, Bola Ahmed Tinubu, bisa tsare-tsaren manufofin da suka ba da damar gudanar da horon, da kuma ga Ministan Harkokin Ciki bisa sababbin gyare-gyarensa. Ya kuma gode wa Shugaban Hukumar NDLEA, wanda Kwamandan Makarantar Horaswa ta NDLEA, Jos, DCG Bashir Samuel Gadzama, ya wakilta, bisa samar da yanayin horaswa mai kyau, tare da yaba wa masu shirya bikin fitar dalibai da malamai da suka gina daliban zuwa jami’ai masu ladabi da ƙwarewa.
A matsayin wani ɓangare na bikin, an karrama dalibai da suka yi fice a horon kamar haka:
Dalibi Mafi Ladabi: ASF II Sarki Francis Uzomi
Mafi Kwarewa a Faretin Filin Aiki: ASF II Anyim Joshua
Mafi Kwarewa a Fannin Ilimi: ASF II Opon Pius Dominic
Taron ya samu halartar manyan jami’ai daga sojoji da hukumomin tsaro na paramilitary, ta hannun shugabanninsu a jihohi, kwamishinoni da daraktoci, tare da sarakunan gargajiya, manyan jami’an gwamnati da sauran manyan baki, lamarin da ya nuna muhimmancin bikin a matakin ƙasa.
Da nasarar kammala Regular Course 06, Hukumar Kashe Gobara ta Tarayya ta ƙara ƙarfafa yawan ma’aikatanta da shirye-shiryen aikinta, lamarin da zai tabbatar da saurin amsa gaggawa da ingantaccen kare rayuka da dukiyoyi a duk faɗin Najeriya. Wannan ci gaba na ƙara inganta tsaron jama’a, gina juriyar ƙasa, tare da tallafa wa aiwatar da ayyukan Hukumar bisa doka da kuma Ajandar Sabuwar Fata (Renewed Hope Agenda) ta Shugaban Ƙasa Bola Ahmed Tinubu.