…Tace Manyan Dakin Ajiya na Miyagun Kwayoyi a Dajin Ekiti da Ondo

Jami’an Hukumar Yaki da Sha da Fataucin Miyagun Kwayoyi ta Kasa (NDLEA) sun samu manyan nasarori a fadin kasar nan, inda suka kwato kwayoyi sama da milyan 7.6 na tramadol da kilo 76,273.4 na nau’o’in tabar wiwi daban daban ciki har da Colorado, Loud, da Skunk a yayin ayyukan sintiri bisa bayanan sirri. Haka kuma, an cafke wasu daga cikin manyan masu hada kai wajen safarar miyagun kwayoyin.

Daga cikin kayan da aka kama, an gano kwalaye 3,874,000 na tramadol 225mg da 100mg tare da lita 252.2 na maganin codeine a wani dakin ajiya da ke kasuwar Oko a Asaba, Jihar Delta, ranar Asabar 6 ga Disamba 2025. Haka kuma, an kama wasu allurai fiye da milyan 1.2 na tramadol 225mg daga hannun wani mutum mai suna Kelechi Nwakocha, mai shekaru 35, ranar Laraba 3 ga Disamba, bayan jami’an NDLEA da ke sintiri a Orogwe, kan titin Onitsha zuwa Owerri, sun dakatar da motarsa da ta taso daga Aba zuwa Onitsha.

A Jihar Adamawa, jami’an NDLEA ranar Litinin 1 ga Disamba 2025 sun tare wata motar Toyota Hiace mai lambar MGU 554 XB a hanyar Maraba zuwa Mubi. Motar daga Jos ta nufi Mubi, kuma an gano fakiti 1,577,112 na tramadol da Exol 5 cikin manyan jakunkuna tare da sabbin takalmi. An kama mutane biyu: Kabiru Buba, mai shekaru 25, da Hamza Abubakar, mai shekaru 32. A wani samamen, an cafke Mudansir Rabiu, mai shekaru 27, a hanyar Zaria zuwa Kano da allurai 197,000 na Exol 5.

A Jihar Ekiti, rundunar musamman ta NDLEA ta yi samame a dajin Omuo Ekiti, inda ta lalata kilo 14,654 na skunk tare da kama mutane biyu: Yusuf Iliyasu, 50, da Okumu Chinedu, 26. A wani samamen da aka yi ranar Talata 2 ga Disamba, an kutsa dajin Asin Ekiti da ke Ikole LGA, inda aka lalata kilo 54,300 na skunk a manyan dakunan ajiya biyu, kuma kilo 28.3 an kwato su domin gabatar da hujja a kotu.

A ranar da haka, bayan samun bayanan sirri, NDLEA ta yi samame a dajin Igoba da ke Akure North LGA, Jihar Ondo. An gano katako 2,483 da jakunkuna 247 na skunk da nauyinsu ya kai kilo 5,442 tare da kama mutane biyar: Jacob Omodowo, mai shekaru 66; Joy Oluatobi Peace, 24; Babatunde Olamide, 40; Echi Fidelis Joseph, 57; da Ankrah Akano, 56.

A Jihar Neja, an kama kilo 500 na skunk daga wata motar Mercedes Benz mai lambar MGU 614 XB kan hanyar Mokwa zuwa Jebba ranar 4 ga Disamba, inda aka kama direban motar, Amos Yakubu, 46. A Abuja, jami’an NDLEA ranar Laraba 3 ga Disamba sun kama kilo 22 na Colorado a kan Abaji expressway. Bincike na gaba ya kai ga kama wadda za ta karba, Blessing Ali, mai shekaru 33, a Jabi Park. A FCT, an kuma kama Aliyu Usman, 39, ranar Juma’a 5 ga Disamba da kilo 24 na skunk da kwayoyi 573,500 na Exol 5 a kan hanyar Kwali zuwa Gwagwalada.

A Jihar Lagos, an kama Ezenwa Udoka a kasuwar Ladipo da jakunkuna 217 na Canadian Loud da nauyinsu ya kai kilo 113. Ranar 5 ga Disamba, an damke Izuchukwu Usulor da kilo 351 na skunk a Onipanu, sannan ranar Talata 2 ga Disamba, an kama Susan Okoro da kilo 104.1 na skunk a Trade Fair Complex, Ojo.

A Jihar Edo, jami’an NDLEA sun gano kilo 447.5 na skunk daga motoci biyu kirar Honda Accord a dajin Agho, Akoko Edo LGA, kuma sun kama Dada Adedara Babawibi, mai shekaru 56. A wani samamen da aka kai dakin ajiya a Isiefve, Ohuwonde LGA, an kwato kilo 315.8 na skunk tare da kama Stanley Obasuwa.

A fadin kasar nan, NDLEA ta ci gaba da yakin wayar da kai kan yaki da sha da fataucin miyagun kwayoyi (WADA) a makarantu, masallatai, coci coci, wuraren aiki da al’umma. Makarantun da suka amfana a makon da ya gabata sun hada da St. Michael’s Academy, Sabon Gari, Kano; Harry Pass Secondary School, Masaje, Gboko LGA, Benue; da Community Junior Secondary School, Okuru Ama, Obio Akpor LGA, Rivers State.

Shugaban NDLEA, Birgediya Janar Mohamed Buba Marwa (Rtd), ya yaba wa jami’ai da ma’aikatan rundunonin SOU, Delta, Adamawa, Imo, Ondo, Lagos, Kano, FCT, Neja, da Edo bisa ayyukan da suka gudanar. Ya ce nasarorin da suke samu da kuma daidaitaccen tsarin rage safarar miyagun kwayoyi da wayar da kan jama’a suna kara inganta yaki da matsalar kwayoyi a kasar.