Cibiyar Kayan Aikin Sojojin Nijeriya (Nigerian Army Resource Centre – NARC) ta gudanar da zaman tattaunawar kwararru na mako-mako a ranar Litinin, 27 ga Oktoba, 2025, a Hall C, TY Buratai Block, Abuja. Taron ya kunshi gabatar da kasidu biyu masu zurfin fahimta kan muhimman batutuwan manufofi da tsaro da suka shafi harkokin hakar ma’adinai da kuma gyare-gyaren tsaron jiragen ƙasa.

Gabatarwar farko mai taken “Ayyukan Hakar Ma’adinai a ƙarƙashin Kula da Jiha” ta fito daga hannun Birgediya Janar S. O. Oloyede (mai ritaya), mni, kwararre kan yankin Yammacin Afirka da Tekun Guinea. Ya yi nazari kan illolin shiga hannun gwamnati a harkokin hakar ma’adinai, inda ya yi nuni da rahoton GlobalData (2025) da ya bayyana cewa kamfanin Barrick Gold’s Loulo Gounkoto da ke Mali ya sake fara aiki bayan dakatar da shi na watanni tara sakamakon sabani tsakaninsa da gwamnatin soji ta kasar. Sabani ya samo asali ne daga batun harajin baya da kuma dokokin hakar ma’adinai da aka sabunta a 2023.

Janar Oloyede ya bayyana cewa kwace ma’adinai daga hannun kamfanonin ƙasashen waje na iya hana masu zuba jari zuwa nan gaba saboda hatsarin siyasa da na doka. Ya gargadi gwamnati da ta nisanci shiga kai tsaye wajen tafiyar da ma’adinai mallakar masu zaman kansu ko na ƙasashen waje, duk da cewa tana son samun cikakken ikon lura da albarkatun kasa.

Ya kuma jaddada cewa gyare-gyaren da ake yi a sashen hakar ma’adinai a Nijeriya, kamar kafa Mineral Resources Decision Support System da kuma sake fasalin Ma’aikatar Ma’adinai da Karafa, na nufin jawo hannun jari daga waje da kuma ƙara gudunmawar sashen ga tattalin arzikin ƙasa. A ƙarshe, ya ba da shawarwari ga Ma’aikatar Raya Ma’adinai domin inganta nagarta, gaskiya, da amincewar masu zuba jari.

Gabatarwar ta biyu wadda Birgediya Janar L. D. Buba, mni, kwararre kan Gabashin Turai da Rasha, ya gabatar, ta mayar da hankali kan “Gyaran Tsarin Sufurin Jirgin Ƙasa a Belarus.” Ya bayyana cewa a ranar 22 ga Oktoba, 2025, gwamnatin kasar ta mika kudirin doka ga majalisar wakilai domin gyara dokokin sufuri ta jirgin ƙasa. Kudirin ya tanadi mayar da wasu ayyukan tsaro daga hannun Belarusian Railways zuwa Ma’aikatar Harkokin Cikin Gida, tare da ƙara sabbin sharuɗɗan lasisi, lafiyar ma’aikata, da takardun shaidar ƙwarewa.

A cewar Janar Buba, wannan gyara na neman haɗa tsare-tsare na tsaro da ingancin aiki a duk tsarin sufuri na kasar Belarus. Ya kwatanta wannan da halin Nijeriya, inda ya ce sabbin layukan jirgin ƙasa irin su Lagos–Ibadan, Abuja–Kaduna, da Itakpe–Warri, na ci gaba da fuskantar barazanar ‘yan fashi, lalata kayayyaki, da garkuwa da mutane.

Ya lura cewa tsarin tsaron jirgin ƙasa a Nijeriya har yanzu ya watse tsakanin hukumomi da dama kamar su Nigerian Railway Corporation, Rundunar ‘Yan Sanda ta Railway Command, DSS, NSCDC, da kuma rundunonin soja a yankunan da ke da hatsari. Wannan rarrabuwa, a cewarsa, na janyo rauni a hada kai, jinkiri wajen daukar mataki, da kuma rage ingancin aiki.

Janar Buba ya kammala da bayar da shawarwari masu yawa da suka shafi haɗin kai tsakanin hukumomin tsaro, musayar bayanan leƙen asiri, da kuma hanzarta daukar mataki domin ƙarfafa tsaron layin dogo da ƙarfafa juriya ga barazanar tsaro a Nijeriya.