Rundunar Sojin Ruwa ta Najeriya ta samu nasarar ceto fasinjoji 17 da ake zargin ‘yan fashin teku sun sace a kan hanyar ruwa ta Calabar–Oron, a Jihar Cross River. Wadannan fasinjojin an sace su ne a ranar 25 ga Satumba yayin da suke tafiya daga Calabar zuwa Oron, kafin a kubutar da su ta hanyar wani hadin gwiwar aikin rundunar sojin ruwa.

A cikin wata sanarwa da aka fitar a ranar Alhamis a madadin kwamandan Nigeria Navy Ship (NNS) Victory, Laftanar Kwamanda S.S. Bala ya tabbatar da nasarar aikin ceto, inda ya bayyana cewa nasarar ta samo asali ne daga hadin kai tsakanin sassa daban-daban na rundunar da wasu hukumomin tsaro. Ya ce aikin ya samu gagarumar nasara ne sakamakon taimakon jiragen leken asirin sama na Nigerian Air Force (NAF) da suka taimaka wajen bibiyar motsin ‘yan fashin teku.

A cewar Bala, bayanan sirri masu inganci da suka fito daga Department of State Services (DSS) da Defence Intelligence Agency (DIA) sun taimaka sosai wajen tabbatar da ingancin wannan aiki. Ya bayyana cewa bayan satar, jami’an NNS Victory tare da goyon bayan Forward Operating Base (FOB) Ibaka sun kaddamar da jerin hare-hare da suka hada da rufe wasu koguna da ake zargin ‘yan fashin ke bi don tserewa zuwa sansaninsu.

“Wadannan matakai sun katse hanyoyin samar musu da kayayyaki, kuma sun raunana karfinsu, wanda hakan ya tilasta musu tattaunawa da Ofishin Mai Ba da Shawara kan Tsaron Kasa (ONSA) domin sakin wadanda aka sace cikin lumana ga rundunar sojin ruwa,” in ji Bala.

Ya kara da cewa fasinjojin da aka ceto an kai su Nigerian Navy Reference Hospital da ke Calabar domin cikakken duba lafiyarsu, kafin daga bisani a mika su ga kamfanin Sea Express Transit Limited, masu aikin jirgin ruwa din da suke ciki lokacin da aka sace su. Bala ya tabbatar da kudirin rundunar sojin ruwa na ci gaba da kare rayuka da dukiyoyin jama’a a kan hanyoyin ruwa na kasar, tare da jaddada cewa irin wadannan ayyukan ta’addanci a ruwa za su ci gaba da fuskantar martani mai karfi da gaggawa daga rundunar.