Daga: Hamisu Ibrahim, Lagos

Mataimakin Kwamandan Hukumar Tsaro ta NSCDC (ACC) John Onoja Attah ya samu babbar karramawa ta Gwarzon Shekara da kuma Exemplary Super Cop Awards a bikin Rainbow Hall of Fame Awards (RAHFA) na shekarar 2026.
An gudanar da bikin ne a ranar Asabar, 28 ga Maris, 2026, a Lagos Chamber of Commerce and Industry da ke Alausa-Ikeja, Jihar Legas, inda aka karrama mutane da suka nuna kwarewa, jagoranci da sadaukarwa ga hidimar kasa.
ACC Attah, wanda shi ne Kwamandan rundunar Mining Marshal ta Hukumar NSCDC, ya samu wannan lambar yabo ne sakamakon rawar da yake takawa wajen yaki da hakar ma’adanai ba bisa ka’ida ba da kuma kare bangaren ma’adanai na Najeriya.
A jawabin karbar kyautarsa, ya danganta nasarorin da rundunar Mining Marshal ta samu da kyakkyawan jagoranci na Babban Kwamandan NSCDC, Ahmed Abubakar Audi, PhD, mni, OFR. Ya bayyana cewa jagorancin CG ya taimaka matuka wajen dawo da daidaito a bangaren ma’adanai, dakile ayyukan ba bisa ka’ida ba, da kuma rage lalacewar muhalli.
Ya kara da cewa ayyukan rundunar sun taimaka wajen rage gurbatar muhalli, kare martabar dan Adam, da kuma rage asarar tattalin arziki da ke faruwa sakamakon hakar ma’adanai ba bisa ka’ida ba.
Masu shirya bikin sun yaba da kwarewa, jajircewa da sadaukarwar ACC Attah wajen aiki, inda suka bayyana shi a matsayin abin koyi na jami’in tsaro mai inganci a Najeriya.

Da yake karin haske kan muhimmancin wannan karramawa, ACC Attah ya jaddada kudirinsa na kara kaimi wajen yaki da hakar ma’adanai ba bisa ka’ida ba, tare da tabbatar da cewa an hukunta masu aikata irin wadannan laifuka. Ya ce rundunar Mining Marshal za ta ci gaba da hada kai da sauran masu ruwa da tsaki domin tabbatar da bin doka a harkar hakar ma’adanai.
Haka kuma, ya yi kira ga ‘yan Najeriya, musamman mazauna yankunan da ake hakar ma’adanai, da su ba da hadin kai ta hanyar bayar da sahihan bayanai da za su taimaka wa hukumomin tsaro wajen dakile ayyukan ba bisa ka’ida ba. A cewarsa, hadin kai na kowa ne zai tabbatar da cigaba mai dorewa da kuma kare tattalin arzikin kasa.