An ƙara tsaurara matakan tsaro a birnin Awka da kewaye yayin da Jihar Anambra ke shirin gudanar da zaben gwamna a ranar 8 ga Nuwamba.

Wakilin da ya bibiyi harkoki a fadin jihar ya lura da yanayi na natsuwa duk da yawaitar jami’an tsaro da aka jibge a wurare daban-daban.

An sanya dakarun tsaro a kusa da hedkwatar Hukumar Zabe Mai Zaman Kanta ta Ƙasa (INEC) da ke Awka, inda aka karkatar da zirga-zirgar ababen hawa ta wasu hanyoyi. A kan titin Nibo–Nise da ke cikin Karamar Hukumar Awka ta Kudu, jami’an tsaro sun kafa sansanoni a muhimman wurare domin tabbatar da zaman lafiya da kuma ba da damar zirga-zirgar mutane da motocin su cikin kwanciyar hankali.

Mrs. Ifeoma Egbo, wata ‘yar kasuwa a kasuwar Eke Awka, ta ce yawan jami’an tsaro da kuma jiragen sama masu sintiri a sararin samaniya sun ƙara tayar da hankalin jama’a. Ta bayyana cewa wasu masu jefa ƙuri’a, musamman tsofaffi, na iya jin tsoron fitowa saboda yawan jami’an tsaro.

Wata ‘yar kasuwa kuma, Mrs. Grace Anagor, ta ce harkokin kasuwanci sun karu sosai yayin da mazauna ke ta sayayya kafin ranar zabe. Duk da haka, ta yaba da matakan tsaro, tana mai cewa hakan alama ce ta shirye-shiryen gwamnati don tabbatar da tsaro a lokacin zaben.

Anagor ta bukaci jami’an tsaro su gudanar da aikinsu cikin kwarewa da mutunta ‘yan kasa.

A baya, hukumomin tsaro sun sanar da tura jami’ai kimanin 60,000 don kare rumfunan zabe 5,720 a fadin jihar. Haka kuma, INEC ta tabbatar da cewa an samu kashi 98.8 cikin 100 na karɓar katin zabe (PVC) kafin gudanar da zaben.