A wani sabon yunƙuri na ƙarfafa tsarin tsaro a Jihar Legas, Kwamandan Hukumar Tsaro da Kare Muhimman Ababen Gwamnati (NSCDC) na jihar, Kwamanda Keshinro Adedotun, ya sake tabbatar da kudirin hukumar na ƙara inganta kariya ga Muhimman Kadarorin Ƙasa da Muhimman Ayyukan Gwamnati.

Kwamanda Adedotun ya bayyana hakan ne yayin halartar bikin yaye sababbin jami’ai da aka kammala horaswa da sake horarwa na sashen COCATRAP, FOUHART da Agro Rangers a Kwalejin Kula da Tsaro, Oke-Mosan, Abeokuta, Jihar Ogun, a ranar Juma’a, 10 ga Oktoba, 2025.

Yayin da yake jawabi ga jami’an da suka kammala, kwamandan ya jaddada muhimmancin ci gaba da horaswa da sake horaswa, musamman a fannin amfani da bindigogi cikin kwarewa da ladabi. Ya ce irin wannan horo na taimaka wa jami’ai wajen kare muhimman kadarorin tattalin arzikin ƙasa, da hana ayyukan ɓarna, lalata, da satar dukiyoyin gwamnati daga hannun miyagu.

Bikin ya samu ban sha’awa ta musamman tare da nuna bajinta ta hanyar gaisuwar biki, gwaje-gwajen lalubo da sake haɗa makamai, kwaikwayon kare manyan baki (VIP protection), da kuma bayar da kyaututtuka ga jami’an da suka fi kwarewa.

An halarci bikin daga manyan baki da jami’ai, ciki har da Provost na Kwalejin, Mataimakin Kwamanda Janar (ACG) Akintelure Niyi; Kwamandan Yanki na Zone 1, ACG Michael Akiboh, fsi (wanda Kwamandan Corps Akeem Adeyinka ya wakilta); Kwamandan NSCDC na Jihar Ogun, Kwamandan Corps Ekundayo Remilekun; da Mataimakiyar Provost ta Kwalejin, Kwamandan Corps Shakirat Adeyinka, tare da sauran manyan jami’ai, ‘yan uwa da abokan karatu na jami’an da suka kammala.