Rundunar Sojin Sama ta Najeriya (NAF) ta sake cimma wani muhimmin ci gaba a kokarinta na zamani, yayin da a ranar Litinin, 6 ga Oktoba, 2025, aka kaddamar da sabon ginin Hedikwatar Annex Complex da ke Gudu, Abuja.

An kera wannan sabon gini ne domin rage cunkoso a tsohuwar hedikwatar NAF da ke Garki, tare da inganta ingancin aiki, walwalar jami’ai, da kuma karfafa ayyukan tsaro. Wannan mataki na kara karfin rundunar wajen kare sararin samaniyar kasar da tsaron ‘yan kasa baki daya.

Yayin bikin kaddamarwar, Ministan Tsaro, Dakta Mohammed Badaru Abubakar, mni, wanda shi ne babban bako na musamman, ya jinjina wa shugabancin NAF bisa hangen nesa, kirkira da jajircewa. Ya bayyana cewa wannan gini alama ce ta jajircewar rundunar wajen ci gaba da ingantawa da neman kwarewa a aikinta.

Dakta Badaru ya kuma bayyana cewa tun kafuwar NAF a shekara ta 1964, rundunar ta ci gaba da fadada ayyuka da nauyin da ke kanta, don haka samar da sabbin wuraren gudanar da aiki kamar wannan ya zama wajibi. Ya bayyana cewa matsugunnai kamar ofishin Air Secretary, Standards and Evaluation, Transformation and Innovation, da kuma 051 Personnel Management Group da Annex na ofishin Chief of the Air Staff za su taimaka wajen rage cunkoso a hedikwatar tare da karfafa tsarin gudanarwa.

“Wannan sabon gini yana nuna al’adun inganci da hangen nesa na NAF,” in ji Ministan, yana yaba wa Air Marshal Hasan Bala Abubakar, shugaban sojin sama, saboda jajircewarsa wajen daidaita aikin da manufarsa ta tabbatar da runduna mai kwarewa da kwarin gwiwa ta hanyar ingantaccen jin dadi da sabunta kayan aiki.

A nasa jawabin, Air Marshal Abubakar ya bayyana cewa an sayi filin Gudu da gangan kuma aka sake gyarawa domin samar da yanayin aiki mai kyau da kuma inganta hadin kai tsakanin sassa. Ya ce wannan aikin hujja ce ta jajircewar NAF wajen inganta kwarewa da jin dadin ma’aikata, yana mai cewa “kwarin gwiwa yana bunƙasa idan aka fifita inganci da kayan aiki.”

“Wannan kaddamarwa shaida ce ta yadda muke da kwazo, juriya da hangen nesa a matsayin rundunar sama ta zamani,” in ji shi.

Ministan Tsaro da Shugaban Sojin Sama sun gode wa Shugaban Kasa Bola Ahmed Tinubu, wanda shi ne Kwamandan Babban Hafsoshin Tsaron Najeriya, bisa goyon bayansa da hangen nesa wajen sake fasalin harkokin tsaro a kasa.

Bayan jawabin, Ministan Tsaro ya kaddamar da sabon ginin Hedikwatar NAF Annex da ke Gudu, inda ya sadaukar da shi domin daukaka sunan Allah da hidimar Jamhuriyar Tarayyar Najeriya.

A baya kafin haka, Air Vice Marshal Idi Sani, wanda shi ne Babban Kwamandan Harkokin Gudanarwa, ya bayyana cewa wannan kaddamarwa ba kawai gini ba ce, illa wata alama ce ta ci gaba da sauyi da bunkasuwar NAF.

Taron ya samu halartar manyan baki, ciki har da Sanata Augustine Akobundu, mukaddashin shugaban kwamitin majalisar dattawa kan Sojin Sama; Hon. Kabiru Al-Hassan Rurum, shugaban kwamitin majalisar wakilai kan Sojin Sama; Janar Christopher Musa, babban hafsan tsaro; sauran hafsoshin rundunoni, da manyan jami’an tsaro.