Kwamandan Hukumar Tsaro da Kare Muhimman Hanyoyi (NSCDC) na Jihar Kano, Kwamanda Bala Bawa Bodinga, ya mika wasikar kaddamarwa ga Gwamnan Jihar Kano, Alhaji Abba Kabir Yusuf, a fadar Gwamnati ta Kano.

Yayin mika wasikar karɓar aiki, Kwamanda Bodinga ya sake jaddada aniyarsa ta kare jama’ar Kano ta hanyar bai wa tsaron manyan kadarorin gwamnati da gine-ginen kasa muhimmanci, tare da tsara dabarun inganta tsaron rayuka da dukiyoyin jama’a a fadin jihar.

“Mai Girma Gwamna, ranar da na karɓi ragamar jagorancin NSCDC a Kano, na umurci jami’aina su gudanar da sintiri da sa ido na sa’o’i 24 a fadin jihar. Wannan ya fara samar da sakamako, domin kwanan nan mun kama masu lalata kadarorin gwamnati. Haka kuma, na umurci kwamandojin yankuna da shugabannin sassa su tabbatar da tsaro a masallatai da coci-coci yayin sallar Juma’a da tarukan ibada na Lahadi,” in ji Kwamanda Bodinga.

Ya kuma tabbatar wa Gwamnan cewa zai ci gaba da kasancewa mai biyayya, goyon baya da jajircewa wajen tabbatar da tsaron rayuka da dukiyoyin al’ummar Kano.

A martaninsa, Gwamna Abba Kabir Yusuf ya yabawa Kwamandan bisa jajircewarsa, tare da tabbatar da goyon bayan gwamnatin jihar ga hukumar NSCDC. Gwamnan ya kuma mika kyaututtuka na musamman ga Kwamanda Bodinga a matsayin nuna godiya bisa kokarin da yake yi wajen inganta tsaro.

Tun da farko, kafin ziyartar fadar gwamnati, Kwamanda Bodinga ya halarci bukin bikin zagayowar cikar shekara 65 da samun ’yancin kai na Najeriya, wanda aka gudanar a filin wasa na Sani Abacha, Kofar Mata, Kano.

An gudanar da bukin cikin kayatarwa, inda Gwamna Yusuf shi ne babban mai duba faretin, tare da halartar mambobin majalisar zartarwa ta jihar, shugabannin hukumomin tsaro, da sauran manyan baki.