Kungiyar Lauyoyi ta Najeriya (NBA), reshen Legas, jiya ta gudanar da zanga-zanga a hedikwatar Rundunar Ruwa ta Najeriya, Ship Beecroft, da ke Apapa, tana nuna adawa da wani saƙo da Rundunar Ruwa ta fitar da ya ayyana tsohon jami’in ruwa kuma lauya, Vice Admiral Dada Olaniyi Labinjo, a matsayin “deserter.”

Shugabar reshen, Mrs Uchenna Akingbade, wacce ta jagoranci zanga-zangar, ta bayyana wannan saƙo a matsayin “ƙarya, marar tushe, kuma rainin kotu,” tana mai tunatar da cewa kotun National Industrial Court (NIC) ƙarƙashin mai shari’a I.G. Nweneka ta yanke hukunci tun ranar 24 ga Maris, 2025 (Shari’a No. NICN/LA/67/2023) cewa Labinjo ba ya cikin wadanda suka tsallake aiki.

Kotun ta bayyana cewa Labinjo, bayan ya kai shekaru 60, an ɗauke shi a matsayin wanda ya yi ritaya daga ranar 1 ga Afrilu, 2017, kuma ya kamata a dawo da shi cikin aiki ko kuma a ɗauke shi a matsayin wanda ya kai matsayin Vice Admiral daga Captain, la’akari da shekarun hidimarsa.

Duk da cewa Rundunar Ruwa ta daukaka ƙara, Akingbade ta zargi matakin fitar da sabon saƙo a ranar 3 ga Satumba, 2025, da ya ayyana Labinjo a matsayin deserter daga ranar 2 ga Disamba, 2019. Saƙon ya ƙara umartar cewa a kama shi idan an gan shi. “Wannan ya take haƙƙin ɗan Adam,” in ji ta, tana ƙara da cewa tun daga lokacin Labinjo ya ɓoye kansa.

Akingbade ta ce manufar zanga-zangar ita ce tilasta Rundunar Ruwa ta mutunta hukuncin kotu tare da janye saƙon.

Sai dai ƙoƙarin mika wasiƙar korafi ga Rundunar Ruwa bai yi nasara ba, domin kwamandan NNS Beecroft, Commodore Paul Mimmyel, ya ƙi karɓar ta. Ya ce ya kamata NBA ta aika da ƙorafinta kai tsaye ga Shugaban Rundunar Ruwa da ke Abuja.

“Ina ganin idan akwai hukuncin kotu, dole ne a zauna a warware. Rundunar Ruwa ba ta cikin rigima. Ita ma hukumar gwamnati ce. Idan kuna da ƙorafi, ku tura zuwa ga Shugaban Rundunar Ruwa,” in ji Mimmyel, yana mai zargin cewa matakin NBA ya yi kama da zanga-zanga a ɓoye.

Akingbade ta nesanta kanta daga wannan zargi, tana mai cewa: “Idan mutum bai yarda da wani abu ba, wannan zanga-zanga ce. Kuna ganin muna tayar da hankali ne a nan? Me ya sa Rundunar Ruwa ke fitar da saƙo alhali har yanzu shari’ar tana gaban kotu?”

Mataimakin shugaban reshen, kuma shugaban kwamitin kare hakkin ɗan Adam, Mr James Shunde, ya yi Allah wadai da matakin Rundunar Ruwa, yana mai cewa: “Kotun ma ta yanke hukunci a matakin kotun koli a kan wannan batu. Amma Rundunar Ruwa ta ki bin hukunci. Wannan raini ne ga dokar kasa.”

Haka kuma, wata mamba ta ƙungiyar, Mrs Koyinsola Badejo-Okunsanya, ta ce zanga-zangar ba wai don Labinjo kaɗai ba ce, illa dai don kare doka da oda. “Yau Labinjo ne, gobe zai iya zama wani. Ayana shi a matsayin deserter duk da hukuncin kotu abu ne da ba za a lamunta ba,” in ji ta.

Ta ƙara da cewa: “NBA za ta ci gaba da kare haƙƙin ɗan Adam da tabbatar da bin doka muddin tana wanzuwa.”