Daga Benjamim Udoaka

Rundunar Sojin Ruwa ta Najeriya ta kori wani ma’aikaci da aka bayyana da SMMEA Uma Tu E5618 bayan gudanar da binciken ladabtarwa kan karya dokokin soja.

A cikin wata sanarwa da aka wallafa a shafin ta na X a ranar Talata, rundunar ta ce an same shi da laifin rashin bin umarnin da aka ba shi bisa doka da kuma barin aiki ba tare da izinin hukuma ba, laifukan da doka ta Sojojin Najeriya ke hukunta su.

Sanarwar ta ce: “An kori SMMEA Uma Tu E5618 daga Rundunar Sojin Ruwa ta Najeriya. An same shi da laifin rashin bin umarnin da aka ba shi bisa doka da kuma barin aiki ba tare da izinin hukuma ba, bisa ga tanadin dokar Sojojin Najeriya. Duk wanda ya yi mu’amala da shi a matsayin ma’aikacin sojojin ruwa yana yin hakan ne a kan haɗarinsa.”

Rundunar ta bayyana cewa matakin ya biyo bayan tsarin ladabtarwa da aka bi yadda ya kamata, wanda ya tabbatar da laifinsa bayan bin ka’ida.

Sojin Ruwa ta ce wadannan laifuka suna daga cikin manyan take dokokin soja, inda ta jaddada cewa tsananin bin ƙa’idoji na da matuƙar muhimmanci wajen tabbatar da ladabtarwa a aiki.

Bayan korarsa, rundunar ta yi gargadi ga jama’a cewa wannan mutum ba ya cikin aikin soji kuma kada a ɗauke shi a matsayin ma’aikacin Rundunar Sojin Ruwa.

Ta kuma sake jaddada aniyarta ta tabbatar da ladabtarwa, gaskiya da ƙwarewa a cikin jami’anta, tana mai cewa aiwatar da ƙa’idojin soja yana da muhimmanci wajen inganta aikin rundunar.