Dan Majalisar Wakilai na Amurka, Riley Moore, ya kira ga Gwamnatin Tarayya ta dauki mataki mai tsauri kan kungiyoyin da ke dauke da makamai a Tsakiyar Najeriya, sakamakon sace fiye da dalibai 300 da malamai 12 daga Makarantar St. Mary’s Catholic School a Jihar Neja a ranar Juma’a.

A cikin wata sanarwa da ya wallafa a shafinsa na X a ranar Asabar, Moore ya nuna bacin ransa kan harin, yana cewa, “A matsayina na uba, ganin irin wadannan hare-hare na tada min hankali matuka.”

Ya bukaci hukumomin Najeriya da su karfafa yaki da wadanda ya zarga da aikata tashin hankalin, yana mai cewa gwamnatin “dole ta kwace makaman mayakan Fulani masu tsattsauran ra’ayi da ke addabar yankin Tsakiyar Najeriya.”

Moore ya kara zargin cewa, tashin hankali da ake kai wa Kiristoci a Najeriya na ta karuwa kuma yana kara dagulewa.

“Cin zarafin Kiristoci a Najeriya na kara ta’azzara ba tare da iyaka ba. A ganina yanzu ya zama kisan kare dangi,” in ji shi.

Ya bukaci a karfafa hadin gwiwa tsakanin Abuja da Washington domin dakile matsalolin tsaro, yana mai cewa, “Ya rage wa gwamnatin Najeriya ta yi aiki tare da Amurka domin kawo karshen kisan da garkuwa da ‘yan’uwa Kiristocinmu.”

Moore ya gargadi cewa ci gaba da hare-haren ka iya sa gwamnatin Amurka ta dauki mataki.

“Wannan bala’in dan Adam dole ya kawo karshe, in ba haka ba, @POTUS ya bayyana a sarari cewa zai dauki mataki domin dakatar da wannan masifa,” in ji shi.

Maganganun sa sun zo ne a tsakiyar karuwar hare-haren garkuwa da mutane da tashin hankali a arewacin Najeriya. A ranar Litinin, ‘yan bindiga sun afkawa Makarantar Sakandare ta ‘Yan Mata ta Government Girls’ Comprehensive Secondary School da ke Maga, Jihar Kebbi, inda suka sace dalibai akalla 24.

A ranar Laraba a Birnin Washington, DC, Moore ya gana da tawagar Najeriya karkashin jagorancin Mai Ba Shugaban Kasa Shawara kan Tsaro, Nuhu Ribadu, inda suka tattauna kan dabarun yaki da ta’addanci da kare al’ummomin da ke cikin hadari. Ya bayyana tattaunawar a matsayin mai gaskiya, budaddiya, kuma mai amfani.

Tawagar Najeriya ta kunshi jami’ai da dama na gwamnatin tarayya da hukumomin tsaro: Ministar Harkokin Waje ta Jiha, Bianca Ojukwu; Sufeto Janar na ‘Yan Sanda, Kayode Egbetokun; Antoni Janar na Tarayya, Lateef Fagbemi (SAN); Hafsan Hafsoshin Sojoji, Janar Olufemi Olatunbosun Oluyede; da Daraktan Leken Asirin Soji, Laftanar Janar Emmanuel Undiendeye, da sauransu.

Taron ya zo ne jim kadan bayan da Shugaban Amurka Donald Trump ya yi gargadin cewa addinin Kirista na “fuskantar barazanar bacewa” a Najeriya, yana mai cewa idan gwamnatin Najeriya ta kasa dakile kashe-kashe, martanin Amurka zai kasance “mai sauri, mai tsauri, kuma mai dadi.”

A gefe guda kuma, Ministan Bayanai da Tsarin Yada Labarai, Mohammed Idris, ya ce a wata tattaunawa da ya yi a Politics Today na Channels TV a ranar Juma’a cewa tawagar Najeriya da ke Amurka na aiki domin gyara abin da ya kira labaran karya game da halin tsaron kasar, musamman zarge-zargen cin zarafin addini.