A wani ɓangare na sabuwar tsarin sake fasalin rundunar sojojin Najeriya, Birgediya Janar Samaila Mohammed Uba ya karɓi ragamar mukamin Daraktan Bayanin Tsaro na Ƙasa (Director of Defence Information – DDI). Ya karɓi mukamin ne daga hannun Birgediya Janar Tukur Gusau a wajen wani gajeren bikin mika mulki da aka gudanar a Hedikwatar Tsaro da ke Abuja, ranar Talata, 4 ga Nuwamba, 2025.

A jawabinsa, Birgediya Janar Uba ya yi alkawarin gudanar da aikinsa bisa ginshiƙai huɗu na dabarun shugabanci, waɗanda suka haɗa da: haɗin kai wajen cimma buri ɗaya, gudanar da aiki cikin lokaci da gaskiya, kirkire-kirkiren fasaha, da haɗin gwiwa da kafafen yada labarai. Ya gode wa wanda ya rigaya shi, Birgediya Janar Gusau, bisa ƙoƙarin da ya yi a lokacin da yake kan mukami, tare da yi masa fatan alheri a ayyukansa na gaba.

An haifi Birgediya Janar Samaila Mohammed Uba a ranar 1 ga Yuli, 1968 a Tudun Wada, Ƙaramar Hukumar Nassarawa ta Jihar Kano. Ya fara harkar soja a Cibiyar Horar da Sojoji ta Najeriya (Nigerian Defence Academy) a matsayin ɗan Short Service Combatant Course 30. An naɗa shi Laftanar (2Lt) a ranar 13 ga Maris, 1993, kuma aka tura shi zuwa Sashen Hulɗa da Jama’a na Rundunar Sojan Ƙasa, daga baya kuma aka koma da shi zuwa Sashen Sojojin Ƙasa (Infantry Corps).

Janar Uba ƙwararren jami’i ne mai ilimi da gogewa. Ya halarci Makarantar Firamare ta Tudun Wada da Sashen Sakandare na St. Thomas Kano, inda ya kammala karatunsa na farko da na sakandare a shekarun 1981 da 1986. Ya samu digiri na farko (BA Hons) a fannin Hulɗa da Jama’a (Mass Communication) daga Jami’ar Bayero, Kano, a shekarar 1990, sannan ya samu diploma na digiri na gaba a Ghana Institute of Management and Public Administration a 2009, da kuma digiri na biyu (Master’s Degree) a fannin Dabarun Tsaro da Ci Gaban Ƙasa (Strategic and Development Studies) daga Bangladesh University of Professionals a 2019.

A cikin doguwar rayuwarsa ta soja, Birgediya Janar Uba ya halarci manyan kwasa-kwasan soja masu muhimmanci da suka haɗa da Senior Staff Course a Ghana Armed Forces Command and Staff College da kuma National Defence Course a National Defence College, Bangladesh.

Ya rike muhimman mukamai da dama a fannoni na umarni, gudanarwa, da koyarwa. Daga cikin su akwai: Officer in Charge of Administration a tsohuwar Infantry Centre and School, Commander 401 Special Forces Brigade a Cross Kauwa, Borno State, Jami’in Hulɗa da Jama’a ga rundunar Najeriya a United Nations Mission in Rwanda, da kuma Jami’in Hulɗa da Jama’a ga tsohon Babban Hafsan Sojan Ƙasa (COAS).

A lokacin da yake Kwamandan Brigade, Birgediya Janar Uba ya nuna babban ƙwarewa da kishin ƙasa, inda ya hana ’yan ta’adda na ISWAP da JAS samun damar kai hare-hare, tare da ƙarfafa kyakkyawar hulɗar soja da jama’a a yankin.

Ya kuma yi aiki a matsayin Malami Babba (Chief Instructor) a Cibiyar Kwamandojin Rundunar Sojojin Ƙasa (AFCSC), Jaji, sannan aka tura shi a matsayin Jagoran Ƙungiyar Horarwa ta DHQ zuwa Kwalejin Kwamandojin Kwastam ta Najeriya (Nigeria Customs Command and Staff College, Gwagwalada) domin horas da jami’an kwastam. Ya kuma rike mukaman Mataimakin Darakta na Ayyukan Tsaro (Peacekeeping Operations) da Darakta na Sashen Kwadago (Personnel Services) a Hedikwatar Rundunar Sojan Ƙasa. Kafin sabon nadin nasa, shi ne Darakta na Sashen Nazarin Hada-hadar Tsaro (Department of Joint Studies) a AFCSC Jaji.

Janar Uba yana da tarin lambar yabo da karramawa, wanda suka haɗa da: Grand Service Star, Distinguished Service Star, Field Command Medal, Passed Staff Course (++) National Defence College (Bangladesh), Nigerian Army Outstanding Tactical Command Medal, da Chief of Army Staff Commendation Award Medal.

Haka kuma, yana memba a ƙungiyoyin ƙwararru kamar: Fellow, Nigerian Institute of Public Relations (NIPR), Member, Nigerian Institute of Management (NIM), Member, Nigerian Army Resource Centre (NARC), da Associate Member, Nigerian Society of International Affairs (NSIA).

Birgediya Janar Uba mutum ne mai aure kuma yana da ’ya’ya. A lokacinsa na hutu, yana jin daɗin wasan squash da kuma karatu.