Kwamandan Hukumar Tsaro da Kare Muhimman Ababen Gwamnati (NSCDC) na Jihar Kogi, Kwamanda Aletan Olumide E., ya jaddada bukatar karin hadin gwiwa tsakanin hukumomin tsaro domin shawo kan sabbin kalubalen tsaro da na zamantakewa da ake fuskanta a jihar.

Ya bayyana hakan ne lokacin da sabon kwamandan sashen hukumar kiyaye hadurra ta kasa (FRSC) a Jihar Kogi, Mista Tanimu Yahaya, ya kai masa ziyarar ban girma a hedikwatar NSCDC da ke Lokoja.

Kwamanda Aletan ya yaba wa hukumar FRSC bisa jajircewarta wajen inganta tsaro da kiyaye dokokin hanya a fadin jihar. Ya ce akwai dadaddiyar alaka mai kyau tsakanin NSCDC da FRSC, wacce ta ginu kan girmamawa da hadin kai wajen kare rayuka, dukiyoyi da muhimman kayayyakin gwamnati.

A jawabin sa, Kwamandan Sashen FRSC na Jihar Kogi, Mista Tanimu Yahaya, ya nuna godiya ga NSCDC bisa rawar gani da take takawa wajen tabbatar da tsaro da kare al’umma. Ya sake tabbatar da shirye-shiryen FRSC na yin aiki tare da NSCDC, musamman wajen dakile matsalolin da suka shafi lodin kaya fiye da kima, jigilar kaya daban-daban a mota guda, da sauran laifukan da ke faruwa a manyan hanyoyin Jihar Kogi.

Ya kara da cewa, hedikwatar FRSC ta umarci dukkan sassan ta su karfafa hadin kai da sauran hukumomin gwamnati da ke da irin wannan nauyin. Yahaya ya tabbatar da cewa ofishinsa a bude yake ga duk wani shawarwari da sabbin tunani da za su taimaka wajen kara tsaron rayuka da cigaban jihar.

A nasa jawabin, Kwamanda Aletan ya nuna farin ciki da wannan ziyara, yana bayyana ta a matsayin tarihi da zai kara dankon zumunci tsakanin hukumomin biyu. Ya jaddada cewa hukumar NSCDC tana da ofisoshi a dukkan kananan hukumomin jihar, wanda hakan ke ba ta damar samun sahihin bayanan sirri da kuma kusanci da al’umma.

Ya ce, “Saboda matsayi da Jihar Kogi take da shi a tsakiyar kasa, wacce ke iyaka da jihohi tara ciki har da Babban Birnin Tarayya (FCT), wannan hadin gwiwa abu ne da ba za a iya kaucewa ba wajen magance manyan kalubalen da jihar ke fuskanta.”

An kammala ziyarar da bayar da kyautar girmamawa daga Kwamanda Aletan ga Kwamandan Sashen FRSC na Jihar Kogi, a matsayin alamar hadin kai da ci gaba da aiki tare domin inganta tsaro da tsararru a jihar.