A kalla ma’adinai 13 aka tabbatar da mutuwarsu, yayin da wasu da dama suka makale a ƙasa, bayan da wani ramin hakar zinariya ya rufta a kauyen Kadauri da ke karamar hukumar Maru, Jihar Zamfara, a ranar Alhamis.

Shaidu sun ce hatsarin ya faru ne kwatsam lokacin da daruruwan ma’adinai ke aiki a cikin ramin. Daya daga cikin wadanda suka tsira, Sani Hassan, ya bayyana yadda ya kuɓuta da rai, inda ya ce ya fito daga ramin domin sha ruwa mintuna kaɗan kafin ramin ya rufe ya binne abokan aikinsa.

“Ni ma ina cikin ramin a baya, amma na fito domin sha ruwa. Da zarar na fito, sai ramin ya rufta ya binne mutane da dama. Fiye da mutum 30 ne ke ciki a lokacin. Nan take aka tono gawarwaki 11, amma akwai sauran da dama a ciki,” in ji Hassan.

Nan da nan ma’adinai da mazauna yankin suka fara aikin ceto da karfinsu. Wani daga cikin masu aikin ceto, Sanusi Auwal, wanda ya rasa ɗan uwansa a hatsarin, ya shaida wa Reuters cewa an tono gawarwaki 13 zuwa jiya Juma’a. Ya ce fiye da mutum 100 ne ke cikin ramin lokacin da ya rufta.

“Mun yi sa’a muka tsira. Daga cikin mutane sama da 100, mu 15 ne kawai muka tsira da rai,” in ji wani wanda ya tsira, Isa Sani, wanda yake karɓar magani a halin yanzu saboda raunukan da ya samu.

Shugaban Ƙungiyar Ma’adinai ta Jihar Zamfara, Muhammadu Isa, ya tabbatar da aukuwar lamarin, inda ya bayyana shi a matsayin daya daga cikin mafi muni da aka taɓa samu a ‘yan shekarun nan. Ya yi tir da rashin tsaron aikin hakar ma’adinai wanda ke jefa rayukan ma’adinai cikin haɗari.

Har zuwa daren Juma’a, ana ci gaba da aikin ceto da taimakon mazauna yankin, wadanda ke amfani da kayan aikin hannu wajen tono ƙasa. Sai dai hukumomi ba su fitar da wata sanarwa ba tukuna, duk da ƙoƙarin da aka yi wajen tuntuɓar mai magana da yawun ‘yan sanda na jihar, DSP Yazid Abubakar.

Hatsarin ruftawar ramukan hakar ma’adinai ba sabon abu ba ne a Zamfara, inda ake ci gaba da yin hakar ma’adinai ba bisa ƙa’ida ba duk da haramcin da gwamnati ta sanya. Wannan mummunar masifa ta sake bayyana haɗarin da ke tattare da wannan aiki a jihar.